(૮૨) શબ્દોની જાળ,A trap of words

 

(૮૨) શબ્દોની જાળ 

                બાદશાહના દરબારમાં દોલત નામનો એક અતિ ભલો ભોળો નોકર કામ કરતો હતો. એકવાર આ દોલત કાંઇક વાંકમાં આવી જવાથી બાદશાહ એના પર ગુસ્સે થયા અને એને દરબારમાંથી કાઢી મુક્યો. બીચારા દોલતના તો બારે વહાણ ડુબી ગયા. એ તો ગયો બીરબલ પાસે અને રડતા રડતા બધી વાત કરી. આજીજી કરવા લાગ્યો કે ગમે તેમ કરીને મારી નોકરી પાછી અપાવો.

 

                બીરબલે કહ્યું કે બાદશાહ પાસે જઈને તારે હું કહું એટલા જ શબ્દો બોલવાના. એટલે તને નોકરી મળી જશે.

 

                દોલત તો ગયો બાદશાહ પાસે ઓરડાની બહાર ઉભો રહીને બોલ્યો--જહાંપનાહ, દોલત દરબારમાં રહે કે જાય?

 

            આ સાંભળી બાદશાહ મુંઝાયો. દોલતનો અર્થ થાય સમૃદ્ધિતેથી “જાય' એમ તો કહેવાય નહીં. તો તો દરબારની સમૃદ્ધિ જાય. તેથી બાદશાહ બોલ્યા--મારા દરબારમાં દોલત સદા રહે.”

 

            આ સાંભળતા જ દોલતના આનંદનો પાર ન રહ્યો. જયારે બાદશાહે જાણ્યું કે આ શિખવનાર બીરબલ છે ત્યારે બાદશાહે એને ઈનામ આપ્યું.

read (૮૧) સાચો પારસમણી