ટેબલ-ટેનિસ,Table-tennis

 

ટેબલ-ટેનિસ

 

 

 

પ્રમાણમાં ઓછી જગ્યામાં ઇમારતની અંદર (in-door) રમી શકાય એવી લોકપ્રિય પાશ્ચાત્ય રમત.

 

 

                        ૧૮૮૧માં આ રમત ઇંગ્લેન્ડમાં શોધાઈ અને પ્રારંભમાં તે ‘ગાર્સિમા’ તરીકે અને ત્યારબાદ ‘પિંગપોંગ’ તરીકે જાણીતી થઈ; પરંતુ આ રમત ટેનિસની જેમ ટેબલ ૫૨ ૨માય છે. એટલે તેનું નામ ૧૯૨૧માં ‘ટેબલ-ટેનિસ' રાખવામાં આવ્યું.

 

                        આ રમતનું સૌપ્રથમ મંડળ ૧૯૨૦માં ઇંગ્લેન્ડમાં રચાયું હતું. જર્મનીના ડૉ. ઓલ લેહમનના પ્રયત્નોને પરિણામે ૧૯૨૬માં આંતરરાષ્ટ્રીય ટેબલ-ટેનિસ ફેડરેશન(International Table Tennis Federation : I.T.T.F)ની સ્થાપના કરવામાં આવી. ૧૯૨૭થી પુરુષો માટેના અને ૧૯૩૪થી મહિલાઓ માટેના વિશ્વકપની શરૂઆત થઈ.

                            ટેબલ-ટેનિસની રમત બંધ ઓરડામાં રમાય છે, જેથી પવનની કોઈ અસર દડા ઉપર પડતી નથી. આ ૨મત માટે ટેબલની લંબાઈ ૨૭૪ સેમી., પહોળાઈ ૧૫૨.૫ સેમી. અને જમીનથી ઊંચાઈ ૭૬ સેમી. હોય છે. ટેબલની મધ્યમાં નેટ લગાડવામાં આવે છે, જેની લંબાઈ ૧૮૩ સેમી. અને ઊંચાઈ ૧૫.૨૫ સેમી. હોય છે. ટેબલ-ટેનિસનો દડો સફેદ કચકડાનો હોય છે. એનો ઘેરાવો વધુમાં વધુ ૧૨.૦૬ સેમી અને ઓછામાં ઓછો ૧૧.૪૩ સેમી. હોય છે. તેનું વજન ૨ વધુમાં વધુ ૨.૫૩ ગ્રામ અને ઓછામાં ઓછું ૨.૪૦ ગ્રામ હોય છે.

                            ટેબલ-ટેનિસનું બૅટ કોઈ પણ કદનું, ઘાટનું અને વજનનું હોઈ શકે. તેની સપાટી અપરાવર્તિત ઘેરા રંગની હોવી જોઈએ. આ રમત ‘સિંગલ્સ’ તેમ જ ‘ડબલ્સ’ તરીકે રમી શકાય છે. આ રમત ૩ અથવા ૫ સેટની હોય છે. દરેક સેટમાં ૨૧ પૉઇન્ટ કરનાર ખેલાડી વિજેતા ગણાય છે. ૩ સેટની રમતમાં ૨ સેટ અને ૫ સેટની રમતમાં ૩ સેટ જીતનાર ખેલાડી વિજેતા ગણાય છે. દરેક ખેલાડીને સતત પાંચ સર્વિસ કરવાની તક મળે છે અને પાંચ સર્વિસ પછી સામા પક્ષના ખેલાડીને સર્વિસ મળે છે. આ રીતે બંને ખેલાડીઓના ગુણનો સરવાળો ૫, ૧૦, ૧૫, ૨૦, ૨૫ એમ થતાં સર્વિસ બદલાય છે. આ રમતમાં જે ખેલાડી સાચી સર્વિસ ન કરી શકે અથવા દડાને નિયમ પ્રમાણે સાચી રીતે પાછો મોકલી શકે નહિ તે ખેલાડી ગુણ ગુમાવે છે. ૨મતમાં સારું પ્રદર્શન કરવા માટે ખેલાડીએ ‘ઍટેક’ તેમ જ ‘ડિફેન્સ’ બંને ઉપર પ્રભુત્વ મેળવવું જોઈએ. રમતમાં સારો દેખાવ કરવા માટે ત્વરિત ‘ફૂટવર્ક’ જરૂરી છે.

                        ભારતમાં પણ આ રમત ખૂબ લોકપ્રિય બની છે અને એશિયા-ખંડમાં આ રમતમાં જાપાન અને ચીન મોખરે છે. દક્ષિણ કોરિયા અને ઇન્ડોનેશિયાના ખેલાડીઓ પણ આ રમતમાં ખ્યાતિ ધરાવે છે. હંગેરીનો વિક્ટર બારના અને મહિલાઓમાં હંગેરીની મારિયા મેડનિયાસ્કી ટેબલ-ટેનિસની દંતકથા સમાન છે.

 

ગુજરાતી યુવકોમાં પણ આ રમત હવે ઘણી પ્રિય થઈ છે.

READ ટેનિસ,Tennis